CEBU – Gikalipay sa mga sakop sa kasundalohan ang gihimo nga lihok protesta sa Sentrong Alyansa ng Mamamayan Para sa Bayan (SAMBAYANAN) isip suporta sa AFP batok sa mga teroristang grupo nga New People’s Army (NPA).
Gibutyag ni Major Israel Galorio, ang tigpamaba sa AFP Visayas Command (VisCom), nga ang gihimo sa SAMBAYANAN kay isip suporta sa ilahang panawagan sa mga school administration, mga ginikanan nga bantayan ang ilahang mga tinun-an o mga anak nga dili malingla sa NPA.
Matud pa, sayang ang kinabuhi sa mga tinun-an nga adunay maayo unta nga kaugmaon apan miliko ang dalan human nga mahilo-an ang hunahuna sa teroristang grupo.
Giingong dako ang papel sa mga ginikanan ug mga eskwelahan sa pagpahimangno sa mga kabatan-onan nga magtutok sa ilahang pagtungha alang sa hayag nga kaugmaon ug dili gayud magpadala sa NPA.
Gitino ni Major Galorio nga dili ang mga sundalo ang kontra sa mga kabatan-onan o sa mga estudyante, inay mandato nila nga protektaran kini batok sa mga malinglahon nga mga sakop sa New People’s Army.
