CENTRAL VISAYAS-Hingpit ang pagpangandam sa Visayas Command (VISCOM) alang sa pagpahigayon og Mall Voting Simulation sa dakbayan sa Sugbo, kapin duha ka buwan ang nahabilin sa dili pa ang Barangay ug SK Elections (BSKE) 2023.
Mao kini ang gibutyag ni Lieutenant General Benedict M Arevalo PA, Commander sa VISCOM.
Matod pa ni Arevalo nga naghimo sila og threat assessment ug validation, ug ingon man naghimo og mga rekomendasyon sa COMELEC alang sa watchlist areas ug security deployment, gani gipakusgan usab nila bisan ang internal nga mga operasyon sa seguridad aron mapugngan ang mga pribadong armadong grupo ug ang CPP-NPA sa pagsabwag og kalisang ug kahadlok sa mga katawhan.
Gipasiugdahan sa COMELEC Region 7 uban sa COMELEC Cebu Provincial Office ang simulation exercise nga gipahigayon sa usa ka mall sa Brgy Pari-an, sa syudad sa Sugbo Cebu City, kung diin gi-simulate sa mga sakop sa 53rd Engineer Brigade and Joint Task Group (JTG) Cebu ang security deployment uban sa mga personnel sa Police Security and Protection Group (PSPG), personnel sa Cebu City Police Office (CCPO), ug personnel sa Philippine Coast Guard.
Isip kabahin sa maong ehersisyo, nagtukod usab ang VISCOM sa pakig-alayon sa COMELEC 7 og Election Monitoring Center sa Camp Lapulapu alang sa command and control aron masiguro ang padayon nga dagan sa komunikasyon ug koordinasyon tali ug taliwala sa mga ahensya nga nahilambigit ug masiguro ang pag-synchronize ug koordinasyon nga mga paningkamot tali ug taliwala sa mga pwersa sa seguridad.
Gidasig usab ni Arevalo ang katawhan sa Visayas region nga mu-“vote wisely” sanglit naa sa mga kamot sa mga botante ang kahigayonan nga makahimog kausaban sa pagkinabuhing mauswagon sa umaabot nga katuigan.
Dugang pa nga gikinahanglang pilion nila ang usa ka lider nga nagpasiugda sa kalinaw, panaghiusa, ug kalamboan ug dili kadtong nagpakaylap sa kapintasan ug nagsabwag og kalisang ug kahadlok, ilabina kadtong mga sakop sa CPP-NPA.
Samtang, ang simulation exercise sa Cebu City gipahigayon dungan sa simulation sa ubang mga dapit sa nasud, apil ang Mock Elections sa Quezon City ug Cavite, ug Mall Voting Simulation sa Manila ug Legazpi City.
