ALCOY, CEBU-Nabalhog sa Alcoy Police Station ang naila nga Cebuano vlogger nga si “Boy Tapang” human kini gireklamo sa iyang kaipon nga nangulata.
Mao kini ang gikumpirmar ni Police Capt. Jerry Magsayo, OIC- PNP Chief sa Alcoy atol sa pakighinabi sa Bombo Newsteam.
Gireklamo si Ronie Suan, Alyas Boy tapang, 25-anyos sa iyang live in partner nga si Cristina Morales, 21-anyos kinsang miingon nga gikulata niini.
Midangop ang biktima sa police station pasado alas 12 sa tungang gabie ug gitaho ang nasinati niini nga pagpangdapat hinungdan nga miresponde dayon ang kapolisan sa Alcoy.
Gisaysay sa biktima nga samtang anaa sila sa balay sa iyang ka live-in partner kay nagkainitay ang ilang panaglalis tungod lang sa vape nga nakita sa iyang mga butang.
Hinungdan nga giingong mao kini ang rason nga gikulata siya sa suspek sa makadaghang higayon nga naigo sa iyang walang bukton o abaga, tuo nga bahin sa tiyan ug sa lain-laing bahin sa iyang lawas hinungdan sa nahiaguman niini na pangos ug bun-og.
Gipaambit usab niini nga dili ra kini ang unang higayon nga gikulata siya tungod kay kaniadtong mabdos pa, kay nakatilaw usab siya og kulata apan nahadlok ug nahigugma ang mipatigbabaw sa iyaha hinungdan nga tak-om lang ang iyang baba.
Apan, karon wala na gayud siya makaagwanta hinungdan nga nakahukom na kini nga mopasaka na og kaso.
Karon, ang 25-anyos nga gitanggong sa ilang buhatan kay mamahimo na kini nga makapiyansa og P3,000 karong adlawa, Abril 3, 2025.
