Nangayo og pasaylo ang usa ka vlogger nga nanghatag og kwarta sa mga naka-stand by nga mga tawo sa kadalanan sa Mabini Street, atubangan sa usa ka dakong tunghaan sa nahisgutang lugar.
Kini human nga mikatap ang maong video sa internet nga nanghatag og kwarta sa mga tawo sa mismong lugar, sa pagsukit-sukit usab sa buhatan sa Cebu City Anti-Mendicancy Office, nga ang maong mga indibidwal dili lehitimo nga libud-suroy apan naka-stand by lang sa maong kadalanan gumikan sa kadaghang mo hatag sa lugar.
Matud sa CCAMO, nga paningkamotan sa buhatan nga ma-imbestigaran ang maong panghitabo aron nga hingpit na kining mapasakaan og kaso subay sa City Ordinance No. 1631 ( Anti-Mendicancy Ordinance o ang pagdili sa pagpanghatag o pagpangayo og limos sa mga tawo sa kadalanan.
Sa pagpakighinabi sa buhatan ngadto sa maong vlogger, misaad kini nga kung ugaling mohatag man kini og hinabang alang sa katawhan, iya na kining idiretso sa Anti-Medicancy Shelter og dili na sa publikong lugar.
Mipahimangno usab ang CCAMO sa mga mahiligong mo hatag sa mga manlilimos nga possible usab silang mapasakaan og kaso susama sa nahitabo sa pipila ka mga libod-suroy.
Gihimug-atan sa buhatan nga malikayan unta ang pagpanglimos kong wala usab mohatag niini.
Una na usab nga mipahimangno ang CCAMO nga kung ganahan muhatag og kaayuhan sa mga libod-suroy mas maayong ipaagi kini sa ahensya sa kagamhanan o mga non-profit oranization aron sa hapsay nga pang-apod-apod nga wala nakalapas sa Anti-Mendicancy Ordinance sa syudad.
