CEBU – Gi-atangan karon sa mga netizen ang gimik sa usa ka vlogger nga taga Davao City nga nagbilin ug kwarta sa nagkadaiyang lugar sa Pilipinas.
Swerte ang bisan kinsa ang makakuha niini gumikan makakwarta gayud.
Nasayran nga niadtong Abrill 2022 dihang gisugdan sa vlogger nga si Ricci Generoso ang “Money Hunt Game.”
Nakit-an ni Ricci ang money hunt challenge sa abroad sa Tiktok maong nakahunahuna kini nga sundogon.
Alang sa challenge, magbutang si Ricci og P500 ug P1,000 sa papel ug ibutang kini sa duct tape.
Human niini, iya kining ibilin sa usa ka dapit ug i-post sa iyang Tiktok account aron ang mga followers maoy mangunay sa pagpangita sa kuwarta.
Aron mahibaw-an ni Ricci kon kinsa ang unang nakakuha sa kwarta, kinahanglan siya nga i-tag sa follower sa video samtang nagkupot sa kuwarta.
