Gidawat ni Bise Presidente Sara Duterte ang hagit sa mga kongresista kaniya nga mopailawom sa neuropsychiatric test human siya niingon nga iyang kaykayon ang lubnganan sa amahan ni Presidente Ferdinand “Bongbong” Marcos Jr., si kanhi presidente Ferdinand Marcos Sr., ug ilaby ang patayng lawas niini sa West Philippine Sea kung dili kuno kini lung-an sa mga Marcos sa pagpamugos ug pagpamolitika.
Matod sa bise presidente, gawas sa neuropsychiatric test, mopaubos usab siya sa drug test apan tungod kay dili man stable sa iyang panan-aw ang mga kongresista, iya usab kining gihagit nga magpa-drug test.
Hinungdan nga nanawagan kini sa Philippine Medical Association, Philippine Psychiatric Society, nga magbutang og guidelines alang nilang tanan sa labing daling panahon.
Giingong dili na mahimo ang test human sa tulo ka buwan tungod kay makapasar lang sila ug ma-clear sa test kung tinuyo nilang mohunong sa paggamit og drugas sulod sa 3 ka buwan.
Gihatagan usab og gibug-aton sa bise presidente nga kinahanglang ipagawas sa telebisyon ang pagsuway aron dili kini ma-fix o matago sa publiko.
Matod ni Duterte, gikinahanglan ang independent 3rd party hair follicle testing busa nanawagan siya sa PMA nga ipahigayon ang drug testing nga iyang gipangayo sa tanan kanila.
Giawhag usab ni VP Duterte ang tanang mga botante nga idemanda ang mga kandidato sa eleksyon nga ipaubos sa drug test.
Gitataw sa bise presidente nga wala siyay problema, apan ang administrasyon giingong nagduso kaniya nga modapig sa oposisyon.
Ang iyang nakita nga problema sa mga nanaway niya karon kay dili siya ma-settle, ug di siya mabayran og kuwarta.
