Giawhag ni Bise Presidente Sara Duterte ang bisan kinsa nga gustong mohatag og donasyon agi’g suporta sa Office of the Vice President nga idonar nalang sa mga naapektuhan pag-ayo sa bagyong Enteng.
Sa usa ka pamahayag, ang bise presidente mapasalamaton sa mga donasyon ug suporta nga nadawat sa iyang buhatan, apan bisan pa sa kataas sa presyo sa pagkaon ug uban pang mga batakang palaliton, gipasiugda ni VP Sara Duterte nga kinahanglan unahon sa publiko ang kaugalingon ug ang ilang pamilya.
Nunot niini, ang bise presidente nagkanayon nga iyang gipasalamatan ang padayon nga suporta ug pagsalig sa publiko sa mga programa sa OVP.
Gidugang pa sa opisyal nga magpabiling matinud-anon ang iyang buhatan sa pagserbisyo ug pagsulbad sa mga isyu nga giatubang sa nasud karon.
Samtang, miabot na sa labing menos 14 ang ihap sa mga nakabsan sa kinabuhi tungod sa bagyong Enteng.
Ug ang Department of Social Welfare and Development adunay kinatibuk-ang P2.67 bilyones nga pundo alang sa hinabang nga naka-stand by.
Matod sa Presidential Communications Office, ang DSWD adunay nahabiling P65.56 milyones nga standby funds ug P2.6 bilyones alang sa food and non-food items.
Gawas pa kini sa kapin sa P16 milyones nga inisyal nga hinabang nga gipaabot sa mga apektadong lugar.
Mokabat sa 767 ka barangay ang apektado sa Bagyong Enteng ug Habagat sa rehiyon II, III, V, VI, VIII, VIII, CALABARZON ug NCR.
Diin basi sa datus sa DSWD, 80,078 ka pamilya o 303,938 ka indibidwal ang apektado sa maong kalamidad ug mokabat sa 60,202 ka indibidwal o 14,607 ka pamilya ang kasamtangang nagpuyo sa 441 ka evacuation centers.
