Gidayeg ni Bise Presidente Sara Duterte ang bag-ohay lang nga malampuson nga combat operation sa Philippine Army sa Negros Occidental.
Giila sa Bise Presidente ang kaisog, disiplina, ug walay hunong nga pasalig sa Army sa pagpanalipod sa mga komunidad ang mga miyembro sa 79th Infantry Battalion (79IB) sa Philippine Army ubos ni Lt. Col. Eric Alfonso sa iyang gitawag nga “successful combat operation.”
Dugang pa niini nga ang kadaugan nagpakita dili lamang sa ilang kahusayan sa operasyon apan lakip usab ang ilang dedikasyon sa pagmintinar sa kalinaw, seguridad, ug pagmando sa balaod.
Bisan kung wala gihisgutan ni VP Sara ang piho nga operasyon, ang PA kaniadto nagtaho bahin sa engkwentro nga nahitabo tali sa mga personahe sa 79th Infantry Battalion sa 3rd Infantry Division ug mga giingong miyembro sa NPA sa Barangay Salamanca, Toboso, Negros Occidental.
Diin gikumpirma sa kasundalohan nga adunay 19 ka giingong miyembro sa NPA ang namatay sa operasyon. Gikataho usab nga usa ka lider sa estudyante, usa ka peryodista nga nakabasi sa Bacolod ug usa ka Fil-Am ang namatay sa engkwentro.
Ang Philippine Army kaniadto mihimakak nga ang uban sa mga namatay mga sibilyan ug nangatarungan nga sila naglihok nga propesyonal ug gibase sa International Humanitarian Law.
Samtang, si VP Sara nanawagan usab sa mga ginikanan ug mga tigbantay nga panalipdan ang ilang mga anak ug pugngan sila sa pag-apil sa mga bayolenteng ekstremistang grupo.
