Gikondenar ni Bise Presidente Sara Duterte ang bag-ong reklamo sa impeachment batok kaniya nga gisang-at sa Bagong Alyansang Makabayan (Bayan), nga gitawag kini nga usa ka “bargaining chip” nga nagtumong sa pagpanghilabot sa 2026 national budget.
Sumala sa Bise Presidente, ang bag-ong impeachment talk nagpakita sa usa ka pamilyar nga sumbanan nga iyang gilambigit sa gisulti ni Sen. Chiz Escudero, Rep. Toby Tiangco, ug uban pang mga magbabalaod niadtong Pebrero 2024, nga ang mga pirma nga nakolekta alang sa iyang impeachment gigamit baylo sa mga alokasyon sa badyet.
Dugang nga giinsistir ni Duterte nga kini nagpakita lamang sa usa ka maniobra sa politika nga mas naka-focus sa presyo kaysa prinsipyo.
Gikritika usab sa Bise Presidente nga walay imbestigasyon nga gihimo aron manubag ang mga nalambigit sa ”impeachment signatures” nga giingong gigamit lamang aron mapukan siya.
Gawas niini, andam usab siya nga motubag sa bisan unsang mga pasangil nga gibase lamang sa mga kamatuoran, apan dili siya magpakahilom samtang ang isyu gigamit alang sa pagpangawat sa badyet.
Samtang, sumala ni Bayan chair Teddy Casiño, gikatakda silang mosumite og bag-ong reklamo sa sunod tuig, nga nagpunting sa giingong pag-abuso sa confidential ug intelligence funds sa Office of the Vice President ug sa Department of Education.
Masaligon ang Kongresista nga makakuha sila og suporta gikan sa mga magbabalaod, sama sa miaging impeachment nga adunay kapin sa 200 ka pirma.
