Gilauman nga mosumiter si Bise Presidente Sara Duterte sa iyang tubag sa Lunes, ugmang adlawa, Marso 16, sa duha ka impeachment complaints batok kaniya human kini gideklarar nga adunay igong porma ug substance.
Sa usa ka press conference, ang miyembro sa House Committee on Justice ug Bicol Saro Representative nga si Terry Ridon mipahibalo nga mahuman na ang 10 ka adlaw nga gihatag sa komite sa Bise Presidente karong hinapos sa semana aron pagtubag sa mga reklamo batok kaniya.
Kung ang Bise Presidente mosumiter og tubag sa Lunes, si Rep. Ridon miingon nga hatagan nila og higayon ang habig sa mga magbabalaod nga misuporta sa mga impeachment complaints ug dayon hatagan usab og kahigayunan si VP Sara nga mopasaka sa iyang tubag.
Samtang, sumala ni Rep. Ridon, kung ang Bise Presidente mosumiter og tubag, ang Justice Committee ang motino kung ang mga impeachment complaints igo na sa basehanan ug ang hearing proper gilauman nga ipahigayon sa Abril 8.
Gipasabot usab sa magbabalaod nga ang dagan sa proseso sa impeachment mahimong mapamubo kung si VP Sara dili mosumiter og tubag sa Lunes.
Hugot usab nga gihimakak sa magbabalaod ang akusasyon sa Bise Presidente nga ang mga proseso sa impeachment batok kaniya usa ka “fishing expedition.”
Samtang, ang sunod nga hearing sa Justice Committee gikatakda sa Miyerkules, Marso 18.
Sumala ni Rep. Ridon, ang mosyon ni Rep. Chel Diokno bahin sa posibleng conflict of interest sa duha ka abogado ni VP Sara, ang kanhi Education ASec. for Procurement Atty. Reynold Munsayac ug kanhi DepEd Spokesperson Michael Poa, hisgutan dinhi.
