Hugot nga gihimakak ni Vice President Sara Duterte ang mga pahayag ni Rodulfo Gracioso Jr. nga naglambigit kaniya sa mga insidente nga matod pa niya wala niya buhata, wala niya kasayri, o wala gayod niya nasinati.
Atol sa press conference sa Davao City karong adlawa, gibasa sa Bise Presidente ang iyang affidavit isip tubag sa mga pasangil ni Gracioso.
Gipahibalo usab ni Duterte nga pormal nga i-file sa iyang kampo ang maong affidavit karong Huwebes, Oktubre 8.
Dugang pa niya, dili siya mohatag og komento o motubag sa mga isyu nga may kalabotan sa nagpadayon nga impeachment trial o sa mga pasangil ni kanhi Senador Antonio Trillanes IV.
Matod sa iyang kampo, ang opisyal nga tubag gitumong sa pagklaro sa iyang panindigan taliwala sa mga pasangil ug sa pag-andam sa angay nga legal nga mga lakang.
Gipaabot ang pagsumite sa affidavit aron mahimong kabahin kini sa opisyal nga rekord sa mga imbestigasyon kalabot sa maong isyu.
