Nanawagan si Bise Presidente Sara Duterte nga ibalik ang P60 bilyon nga pondo nga kaniadto gibalhin sa National Treasury ngadto sa Philippine Health Insurance Corporation (PhilHealth), human gideklarar sa Korte Suprema nga supak sa konstitusyon ang transaksyon.
“The Supreme Court is the final arbiter of legal cases in our country. And if they say that it is unconstitutional, then it is. And then it should be returned,” matod sa Bise Presidente.
Ang kantidad kabahin sa kinatibuk-ang P89.9 bilyon nga “sobrang pondo” sa PhilHealth nga gibalhin sa Department of Finance niadtong 2024 aron pondohan ang wala ma-program nga mga alokasyon sa nasudnong badyet.
Giinsistir ni Duterte nga ang mga pondo sa PhilHealth kinahanglan magpabilin sa ahensya aron masiguro ang pagpadayon sa mga programa sa panglawas sa nasud.
Gipaambit usab niya nga nakigsulti siya kang kanhi Presidente Rodrigo Duterte bahin sa desisyon sa Korte Suprema.
“We talked about the unconstitutionality of the transfer of the PhilHealth funds, 60 billion of it. And it was decided that it should be returned to PhilHealth,” matod niya.
Sa kinatibuk-ang P89.9 bilyon, P60 bilyon ang nabalhin na ngadto sa National Treasury sa wala pa mopagawas ang Korte Suprema og temporary restraining order (TRO) nga nagpahunong sa gikatakdang pagbalhin sa laing P29.9 bilyon niadtong Nobyembre 2024.
