CEBU CITY-Gipahibalo ni Department of Education Assistant Secretary Francis Cesar Bringas sa usa ka press conference nga gipangandaman nila ang pagtambong sa closing ceremony sa Palarong Pambansa karong Martes si Vice President Sara Duterte.
Matod niya, anaa usab sa closing ceremony si Ilocos Norte Governor Mat Manotoc kay ang Ilocos Norte man maoy host sunod tuig sa Palarong Pambansa 2025.
Sa closing ceremony karong Martes, ipahibawo pud Palarong Pambansa Board ang mo-host sa 2026 Mindanao edition sa Palarong Pambansa.
Kabahin sa seguridad sa pagtambong ni VP Sara karong Martes, mipahayag si ASec Bringas nga ang protocol sa buhatan ni VP Sara maoy makig-alayon sa kapulisan dinhi sa dakbayan sa Sugbo.
Naglaom si Asec Bringas nga susama ra sa kahigpit ang seguridad nga ipatuman sa closing ceremony sa seguridad sa opening ceremony niadtong Hulyo 9, diin si Presidente Ferdinand “Bongbong” Marcos Jr. maoy pinasidunggang mamumulong.
Nasayran nga ang Kagamhanan sa Probinsya sa Sugbo, pinaagi ni Gobernador Gwen Garcia midonar og P8 milyones nga maoy gamiton sa pagpahigayon sa closing ceremony.
Gipahibawo usab ni ASec Bringas nga magpadayon ang mga schedule sa duwa sa Palaro bisan sa nasugatang kakulian sama sa uwan.
