Gipasalig sa House of Representatives nga abli kini sa pagdawat kang Bise Presidente Sara Duterte kung mausab ang iyang hunahuna ug motambong sa ikaupat nga State of the Nation Address (SONA) ni Presidente Ferdinand “Bongbong” R. Marcos Jr. sa Hulyo 28.
Niingun si House spokesperson Atty. Princess Abante nga bisan og nagpadala na og sulat ang buhatan ni Duterte nga dili siya motambong, magpabiling abli ra gihapon sa tanang opisyal sa gobyerno, lakip na sa Bise Presidente, ug gipasiugda ang importansya sa tinuig nga report sa Presidente ngadto sa Kongreso ug sa katawhang Pilipino.
Ang pamahayag ni Abante nunot sa kompirmasyon ni House Secretary General Reginald “Reggie” S. Velasco sa niaging semana nga ang Office of the Vice President (OVP) nipadala og suwat nga nagkanayon nga si Duterte dili na motambong sa SONA sa ikaduhang sunod-sunod nga tuig.
Bisan pa niini, si Velasco niingon nga magpadayon ang tanang preparasyon lakip na ang paghatag og designated seat sa VIP gallery ug holding room sa Bise Presidente ug sa iyang mga staff kung ugaling mausab ang iyang hunahuna.
Wala mohatag og rason ang OVP sa wala pagtambong sa Bise Presidente, apan namatikdan ni Velasco nga ang tanang dinapit nga opisyal sa gobyerno nikumpirma sa ilang pagtambong.
Si Presidente Marcos gikatakdang mohatag sa iyang SONA atol sa joint session sa Senado ug Kamara sa plenary session hall sa Batasang Pambansa sa Quezon City subay sa Konstitusyon.
Ang SONA naglatid sa dagkong mga nahimo sa administrasyon, naghisgut sa mahinungdanong mga hagit nga giatubang sa nasud, ug naglatid sa mga palisiya ug gisugyot nga mga balaod alang sa umaabot nga tuig.
