Mag-atubang og kaso ang labing menos walo ka mga mayor sa munisipyo gikan sa ika-5 nga Distrito sa Sugbo tungod sa pagbiya sa ilang mga pwesto taliwala sa bagyong Tino.
Kini ang gipaambit ni Interior Secretary Jonvic Remulla, nga ang Department of the Interior and Local Government (DILG) gikatakdang mopasaka og mga reklamo batok sa 24 ka mga opisyal sa lokal nga gobyerno nga mibiyahe sa gawas sa nasud gikan sa Nobyembre 9 hangtod 15, nga nakalapas sa travel ban nga gipahamtang atol sa Bagyong Uwan.
Ug gikumpirmar niini nga ang mga opisyal gikan sa Cebu lakip sa mga pasakaan og kaso, lakip na ang walo ka mga mayor ug usa ka miyembro sa Provincial Board (PB) gikan sa probinsya nga mibiyahe sa United Kingdom atol sa bagyong Tino niadtong Nobyembre 4.
Mag-atubang sila og mga reklamo nga abandonment of duty, gross neglect ug insubordination nga ipasaka sa Office of the Ombudsman.
Basi sa datos sa DILG Central Office, diin nagpakita nga sila si Mayor Aljew Fernando Frasco sa Liloan, Felijur Quiño sa Compostela, Avis Ginoo-Monleon sa Catmon, Alfredo Arquillano Jr. sa San Francisco, Edgar Rama sa Poro, Greman Solante sa Tudela ug Manuel Santiago sa Pilar, nilarga sa London sa United Kingdom atol sa pag-kuso-kuso ni Tino sa probinsiya.
Samtang, si Cebu 5th District PB Member Andrei “Red” Duterte kabahin usab sa grupo nga mibiyahe paingon sa United Kingdom uban ni 5th District Rep. Duke Frasco ug sa iyang asawa, nga si Tourism Secretary Christina Frasco, kinsa mitambong sa usa ka global tourism expo sa London.
Ang mga mayor ug ang board member nakakuha og Authority to Travel gikan sa Office of the Governor niadtong Septyembre. Apan, sila si Frasco, Arquillano, Monleon ug Quiño wala makakuha og Foreign Travel Authority gikan sa DILG Portal.
Ingon man nga si Borbon Mayor Nico Dotillos lang ang mikanselar sa iyang biyahe sa London samtang ang Tino unang mitugpa sa Cebu sa Camotes Group of Islands, paingon sa Borbon.
Gikinahanglan usab ang mga lokal nga lider ubos sa mga circular sa DILG bahin sa pagtubag sa kalamidad nga magpabilin sa ilang mga lugar aron sa pagdumala.
