Na-deport na sa Pilipinas ang negosyanteng wanted nga si Alan Dennis Sytin sa kasong pagpatay.
Gikonsiderar si Sytin nga utok sa pagpatay sa iyang igsuon nga si Dominic Sytin, ang presidente ug chief executive officer sa United Auctioneers Inc. niadtong 2018 sa usa ka hotel sa Subic Bay Metropolitan Authority sa Olongapo city sa Zambales.
Niabot si Alan sa Ninoy Aquino International Airport sa Pasay City niadtong Biyernes a gabii diin gisilbihan kini og warrant of arrest sa Police Regional Office-3 (PRO-3).
Giisyu ang warrant sa Manila RTC Branch 7 niadtong Setyembre 1, 2020 alang sa kasong murder diin wala girekomendar sa korte ang piyansa alang sa temporaryong kagawasan sa suspek.
Gidawat ug gi-eskortan si Sytin sa tigpamaba sa Philippine National Police (PNP) ug PRO-3 Director Police Brig. General Jean Fajardo uban sa NAIA-Aviation Security Group ug San Fernando City Police Station.
Ug sa pagkakaron, si Alan Sytin anaa na sa hingpit nga kustodiya sa PNP.
Matod ni Fajardo, kini nga misyon nagpakita sa dili matarug nga pasalig sa PNP sa paghatud sa mga kriminal ngadto sa hustisya bisan asa sila milayas.
Dugang niini nga ang kooperasyon tali sa Royal Malaysia Police ug sa PH diplomatic representatives sa Malaysia nagpakita usab nga walay pugante nga makalingkawas sa pagpatuman sa balaod kung ang mga nasud maghiusa batok sa krimen.
Kahinumduman nga napriso si Sytin sa Malaysia human masikop niadtong Marso 22, 2025 sa Special Investigation Branch sa Petaling Jaya District Police sa Cobra Rugby Club sa Selangor tungod sa kapakyas sa pagpresentar og balidong travel document nga supak sa Malaysia’s Immigration Act.
Diin ang iyang pasaporte sa Pilipinas gikanselar usab kaniadtong Setyembre 12, 2024 ug usa ka Interpol Red Notice ang gipagawas kaniadtong Enero 24, 2020.
