CEBU-Gibutyag ni Cebu City North District Councilor Nestor Archival nga samtang gitrabaho o gipadayon ang mga dagkong proyekto alang sa pagsulbad sa problema sa baha sa dakbayan sa Sugbo, labing maayo nga mohimo og alternatibo o pasiunang lakang aron mapugngan ang pagsaka sa tubig-baha.
Usa sa mga sugyot ni Archival mao ang pagtukod og mga water catchment sa kabukiran.
Matod sa konsehal niining paagiha, mohinay ang bul-og sa tubig sa ubos.
Dugang pa, nga makabentaha usab kini tungod kay ang tubig nga ibutang sa mga catchment magamit alang sa irigasyon sa mga mag-uuma.
Matod ni Archival nga mohimo siya og resolusyon alang sa maong katuyoan ug malaumon nga uyonan kini sa iyang mga kaubang konsehal.
Dugang pa sa konsehal nga tinuod na kaayo ang problema sa baha sa nagkadaiyang dapit sa dakbayan busa panahon na nga mangita pa ang kagamhanan og mga paagi aron mahatagan kini og solusyon.
Laing kaayohan sa mga water catchment, matod ni Archival, mao nga kini makatabang sa pagpugong sa pagbanlas sa tinubdan sa tubig ilalom sa yuta.
Tungod niini, dili na mabalaka ang mga tag-iya sa balay nga nagpuyo ubos sa bukid ilabi na panahon sa kusog nga ulan.
Sa nangaging mga taho, ang Cebu City makakuha og dugang pundo gikan sa Department of Public Works and Highways alang sa paghuman sa pipila ka flood-control projects sa dakbayan.
