CEBU CITY- Gibutyag ni Cebu City Councilor Jun Alcover ang Chairman sa Committee on Agriculture nga balik-balik na ang aksyon ug ang problema sa mga mag-uuma sa nakalabayng administrasyon hangtud pa sa kasamtangan apan, wala gihapo’y malungtaron ug tinud-aray nga solusyon alang sa mga mag-uuma sa Dakbayan sa Sugbo.
Una naa niini mao ang panahon sa tumang kainit, diin gisaysay ni Alcover nga usa sa mga problemang nahimamat mao ang kakuwangan sa suplay sa tubig, kakuwangan sa sakyanan nga magdumala sa paghatud sa mga baligyaon paingun na sa dakbayan ug sa mga pampublikong merkado.
Inay nga maningkamot panahaon sa ting-uwan po sa nakalabayng panahon nga ting-uwan, nahimo nang reactive ang sitwasyon karon sa City Agriculture office, gumikan kay wala pay nakaplagan usab nga mga water ponds o kabutangan ug kapundohan og tubig nga mamahimong suplay pangbobo sa mga mag-uuma.
Dugang pa nga kung ugaling aduna man gani hinabang usab nga ipanghatag, gitataw niini nga mag sige nalang og balik-balik sama nalang sa baril, hose, ug mga dili dekalidad nga mga fertilizers ug binhi.
Mao kini nga mga sitwasyon ug butang ang namatyagan ni Alcover ug buot niini nga usbon.
Hinungdan nga nag sugyot kini karon og pagtukod og usa ka post-storage facility ang Dakbayan sa Sugbo, ug ingun man ang panginahanglan og mga water tankers aron mao ang mamahimong gamiton kung ugaling mahutdan og suplay sa tubig ang kabukiran.
