Gikonsiderar karon sa White House ang pagpamusil sa Annunciation Catholic School sa Minneapolis isip usa ka matang sa ‘ “hate crime”.
Ang press secretary sa White House nga si Karoline Leavitt niingon nga basi sa imbestigasyon sa FBI, ang 23-anyos nga suspek nga si Robin Westman, gitarget ang mga Katoliko.
Ilahang gibasi ang maong pamahayag sa nahimong manifesto sa suspek nga nakuha sa ilang social media account.
Sa maong panghitabo, nioabot ngadto sa 18 ka mga tawo ang naangol, diin 15 niini mga bata nga nag-edad og sayis ngadto sa 15 samtang tulo ang mga hamtong.
Kahinumduman nga duha ka mga biktima ang namatay sa edad nga otso ug 10 anyos samtang kadaghanan sa mga biktima nakagawas na sa tambalanan.
Tungod sa insidente, si Minnesota Governor Tim Walz nimando sa pagbutang og mga pulis sa mga eskwelahan aron dili na masubli ang pagpamusil.
