CEBU CITY — Dili pa makahatag ug konklusyon ang PNP-medico legal kung nahilabtan gayud ang pagkakabaye sa 14 anyus nga si Justine Andayop kinsang nakaplagang patay sa kalibunan sa lungsod sa Pinamungajan.
Gipahibalu ni Dr. Benjamin Lara, ang medico legal sa PRO 7 Crime Laboratory, nga sa gipahigayun niini nga eksaminasyon, adunay nakuha nga ‘whitish fluid’ sa kinatawu sa biktima ug giingung minipis na ang hymen sa menor de edad.
Gipasabut ni Dr. Lara nga ang nakuha niini nga ‘whitish fluid’ dili gilayun niini maingun nga usa ka ‘seminal fluid’ gumikan kay posibling ordinaryo lang kini nga ‘discharge’ sa usa ka babaye, samtang ang giingung minipis na ang hymen niini posibling aduna kini ‘history sa sexual abuse’ apan dili pa sigurado gumikan kay ang babaye adunay nagkalain-lain nga ‘appearance’ sa hymen.
Gibutyag ni Dr. Lara nga dalhun pa niini ang mga nakuha niini nga specimen sa kaulohan alang sa dugang nga eksaminasyon una kini nga makahatag ug konklusyon.
Basi sa medico legal, adunay nakita nga hiwa sa li-ug ug dinunggaban sa wala nga dughan diin mao ang hinungdan sa kamatayon sa biktima.
Samtang giklaru ni Dr. Rene Joseph Bullecer nga posibli usab nga ma-deform o maguba ang ‘hymen’ sa babaye nga walay ‘sexual intercourse’ kung kini mahiligun ug bisikleta, magkabayo ug uban pa.
Dugang pa niini nga nga magkasaka ang edad sa babaye, magkanipis usab ang ‘hymen’ niini.
Gi-asuy ni Bullecer nga sa 14 anyus nga pangedaron sa biktima, giingung mas makatuo kini nga adunay pakighilawas nga nahitabu o adunay ‘background’ sa pakighilawas ang menor de edad.
IMBESTIGASYON
Nagpadayun pa ang imbestigasyon sa Pinamungajan PNP sa krimen nga gikamatyan sa 14 anyus nga si Justine Andayop.
Gipahibalu ni Police Major Felicisimo Aranas, Jr., ang hepe sa Pinamungajan PNP, nga pending pa ang ilahang pagpasaka ug kaso gumikan kay aduna pa’y gipahigayun nga eksaminasyon ang PNP-medico legal pinaagi ni Dr. Benjamin Lara.
Gidugang pa ni PMaj. Aranas nga gi-release na nila ang lima ka mga person of interest gumikan kay giingung igu ra man kini nga imbitar sa kapulisan alang sa imbestigasyon ug wala pa’y direkta nga makatumbok kung si kinsa kanila ang suspek sa krimen.
Apan giklaru sa hepe nga aduna pa’y lain nga person of interest ang ilaha unyang imbitarun alang sa interogasyon.
