CEBU CITY – Subling gihimug-atan ni Dr. Rene Josef Bullecer nga walay angayang kabalak-an ang publiko kung adunay quarantine facility sa ilahang area.
Matud ni Dr. Bullecer nga zero percent ang ‘danger’ sa usa ka lugar nga butangan sa nahisgutang pasilidad.
Kini ang pagpahinumdom sa doktor human sa tumang kabalaka sa mga residente sa Barangay Taptap nga paghimo ug quarantine facility sa Cebu City Resource Management and Development Center (CREMDEC).
Sigon ni Bullecer nga mugna lang sa usa ka ‘wild imagination’ ang hinungdan sa kabalaka sa mga tawo kalabot sa coronavirus disease (COVID-19).
Gani, gitataw niini nga mas delikado pa ang pagsulod ug ospital gumikan kay anaa ang tanang kagaw nga naglibot-libot itandi sa pagbutang ug quarantine facility sa usa ka lugar nga adunay mga residente nga nagpuyo.
Subling mipahinumdom si Dr. Bullecer nga pinaagi lang sa contact ug direct transmission ang pagtapot sa COVID-19 ug dili kini pinaagi sa hangin hayan walay angayan nga kabalak-an.
Gipasabot sa doktor nga ‘isolated’ usab ang sakyanan sa mga Persons Under Monitoring (PUMs) gikan sa airport paingon sa quarantine area ug dili ordinaryo nga sakyanan.
Napanglantawan ni Bullecer nga kuwang gayud ang pagsabot sa mga tawo kalabot sa maong sakit hinungdan sa ilahang gibati nga kahadlok.
