CEBU – Gitataw sa usa ka vendor sa Carbon Public Market nga uyon sila sa development sa naasoy nga merkado apan gikinahanglan nga alang gayud sa kinabag-an.
Matud ni Anna Ariosa, fish vendor, nga gikinahanglan nga ‘people-based’ nga modernization ang ipahigayon ug dili pang ‘world class market’ gumikan kay mga yanong Sugbuanon lang man usab ang mugamit niini.
Sigon ni Ariosa nga ang gusto lang sa tawo mao ang limpyo, hapsay ug luwas nga merkado, hinungdan nga dili na angayan pa nga magtukod ug commercial hub diin silang mga vendors ang hilabihan nga maapektohan.
Sugyot pa niini nga inay commercial hub, mas maayong gamiton kini nga kabutangan sa mga vendors sa Carbon Public Market nga anaa lang sa kadalanan namaligya arun nga mahapsay usab sila.
Gihimug-atan ni Ariosa nga wala’y kapuslanan ang pagpirma sa mga opisyal sa dakbayan sa Sugbo sa maong proyekto gumikan kay giingong ang pipila nga mipirma wala man makabasa sa tibuok nga nakalatid sa kontrata ug gipalabay lang sa ilahang mga kamot.
Nagkanayon kini nga dakong kadaut kanila ang maong proyekto gumikan kay sa Carbon Public Market nabuhi ang ilahang pamilya pinaagi sa ilahang mga tagsa-tagsa ka panginabuhi-an.llBJS
