Giila ang actress nga si Xyriel Manabat isip Best Actress sa full-length category sa 2026 Puregold CinePanalo Film Festival tungod sa iyang papel sa “Stuck on You.”
Gibidahan ni Manabat, uban ni River Joseph, ang maong romcom nga gidirek ni Mikko Baldoza.
Dako ang pasalamat sa aktres nga siya ang nakakuha sa maong title ug gipaambit usab niini nga grabe siya nga nalingaw sa proseso sa paghimo sa ilang salida.
Samtang, nadawat ni Juan Karlos ang Best Actor award tungod sa iyang performance sa “Mono no Aware,” ug nakuha usab sa iyang co-star nga si Momoko Kobayashi ang titulo nga Best Supporting Actress.
Ang “Mono No Aware” maoy migawas nga dakong mananaog sa festival, diin nakakuha kini og daghang mga pasidungog lakip na ang Best Director alang kang BC Amparado, Best Ensemble, Best Editing, Best Cinematography, Best Sound Design, International Jury Award, ug ang kinatas-ang premyo nga Best Picture o Pinaka-Panalong Pelikula.
Matod ni Festival Director Chris Cahilig, milapas sa gipaabot ang resulta sa 2026 CinePanalo Film Festival karong tuiga, tungod kay mas daghang tawo ang mitambong, nahurot ang mga tiket sa daghang screenings, ug nakadawat og maayong mga review ang ilang mga salida.
