CEBU CITY-Giplano karun sa Cebu City Transportation Office (CCTO) nga magbutang og zipper lane sa SRP viaduct.
Kini arun sa paglikay sa bagang duot sa trapiko kung ugaling adunay ma-aberya nga sakyanan sa Cebu Coastal Road.
Gibutyag ni Atty. Kent Francesco Jongoy, CCTO Assistant Department Head, nga dili na buot ma-usab pa ang nahitabo niadtong nakalabay nga buwan sa Pebrero kung diin naabtan og siyam ka oras una pa nakuha ang mi-aberya nga trailer truck diin nakamugna og grabi nga kahuot sa mga sakyanan.
Matud pa, makig-alayon ang CCTO sa Department of Public Works and Highways (DPWH) alang sa maong zipper lane.
Hinuon, gitino ni Atty. Jongoy nga dili libre ang maong towing services, diin magbayad sa gihapon ang mga tag-iya sa ma-aberya nga sakyanan.
Sa kasamtangan, ang CCTO adunay duha ka mega tow truck nga magamit alang sa SUV ug plano sa ahensya nga pun-an pa kini alang usab sa mga dagko nga truck.
Ang pamunoan usab sa CCLEX ang andam nga mo-abag sa CCTO pinaagi sa ilahang mga towing services arun nga maka-responde gilayon sa mga maguba nga sakyanan.
