CEBU CITY- Na-ugdaw ang 43 ka panimalay, hinungdan nga nawad-an og pinuy-anan ang anaa sa 243 ka mga indibidwal gikan sa 61 ka pamilyahan. Kini human nahiaguman sa mga residente niadtong Abril 5, ang dako nga sunog sa Sitio San Isidro, Barangay Inayawan.
Sa pakinghinabi sa Bombo News Team kang Cebu City Councilor, Joel Garganera, iyahang gikompirma ang naasoy nga dakong sunog nga ni-ulbo, kagahapong adlawa sa nahisgutang lugar.
Dugang ni Garganera, ang mga biktima sa maong trahedya nakadawat og dali nga aksyon pamaagi sa pagtunol og mga hinabang.
Inubanan sa Cebu City Government sa pakigtambayayong sa Department of Social Welfare and Services (DSWS), mipaabot og hinabang pamaagi sa paghatag og pack nga mga pagkaon, sulod sa tulo ka adlaw.
Sa pikas bahin, gitino sa kabomberohan sa Dakbayan, nga miabot sa 33 ka mga fire truck ang miresponde sa maong sunog.
Dugang pa, nga nakatala ang Cebu City Fire Office og mokabat sa P700,000 danyos ug milamoy sa 800-square-meter area.
Base sa imbestigasyon, adunay gikatahong na-angol, kinsa nakaangkon og second-degree burn sa wala nga kamot.(BOMBO Irene Ardiente)
