PROVINCE OF CEBU– Mimugna ang Kagamhanang Lalawigan sa Sugbo sa Provincial Education Secretariat (PEdS) nga tahasan sa pag-consolidate sa programang pang-edukasyon sa probinsya tungod sa makabalakang report sa Second Congressional Commission on Education (EDCOM II) nga adunay dakong bahin sa mga tinun-an ang maglisud og basa ug pagsabot sa gitudlo sa eskwelahan.
Kini ang gi-anunsyo ni Cebu Provincial Governor Pamela “Pam” Baricuatro atol sa pakighinabi niini sa mga sakop sa tigbalita niadtong Miyerkules, Marso 18 nga matod pa ang dedicated education secretariat kay maoy mangulo sa pagsulbad sa krisis sa edukasyon sa mga tinun-an sa Sugbo sama sa stunting ug struggling readers sa grades 1-3.
Namugna ang posisyon pinaagi sa Executive Order No. 19 series of 2026 diin ang education secretariat kay makigtambayayong sa Provincial School Board (PSB) aron ang mga programa ug ang paggamit sa Special Education Fund (SEF) kay mapuslan sa mga epektibong pamaagi.
Sa eksklusibong pakighinabi sa Bombo Radyo Cebu News Team kang Aldwin Empaces, ang Assistant Provincial Administrator sa Kapitolyo sa Sugbo nga asoy pa nga hagbay ra kining adbokasiya ni Gov. Baricuatro sa pangutanang kung nganong walay dedikadong education office ang mga local government units (LGUs) sa probinsya aron mahiusa ang pagsulbad sa mga suliran sa mga tunghaan.
Gani dugang pa nga ang pagtudlo og education secretariat kay pasiuannag aksyon palang kini sa Kapitolyo diin sa pagkakaron kay nag-awhag na sila sa Provincial Board nga magmugna og ordinansa sa institutionalized education office.
Kahinumduman nga na-report sa EDCOM II nga ang Sugbo adunay 27,335 ka mga stunted children sa edad nga 0-5 years old, 109,320 ka mga struggling readers sa grades 1-4, ug 103 ka mga barangay ang walay Daycare Centers.
