-- ADVERTISEMENT --

CEBU CITY- Gimando sa Maritime Industry Authority (MARINA) ang dinaliang pagsuspinde sa Passenger Ship Safety Certificate (PSSC) sa MV Ocean Jet 168, nga gipadagan sa Ocean Fast Ferries, Inc., human kini masunog sa kadagatan duol sa Dakbayan sa Danao, Sugbo, gahapon Domingo, Nobyembre 22, 2026.

Base sa pasiunang taho, miulbo ang sunog sa engine room sa maong barko mga alas 10:40 sa buntag samtang naglawig kini gikan sa Siyudad sa Sugbo paingon sa Siyudad sa Ormoc, sakay ang 326 ka mga pasahero. Dali ra hinuon nga napalong ang kalayo ug walay natala nga naangol o nakalas sa maong insidente.

Gipadala sa kompanya sa barko ang MV Ocean Jet 88 aron motabang sa apektadong barko ug masiguro ang luwas nga pagbalhin ug pagbalik sa mga pasahero sa Cebu City, diin gihikay ang gikinahanglang tabang ug ang mga plano alang sa ilang pagpadayon sa biyahe.

Nagpadala na usab ang MARINA Regional Office VII og mga personahe aron mag-monitor sa sitwasyon ug makig-alayon sa nagpadayong pagtubag sa insidente.

Magpabiling epektibo ang suspensyon sa safety certificate sa barko hangtod nga mapamatud-an ang pagtuman niini sa tanang rekisitos sa kaluwasan ug makapasar sa gikinahanglang survey o inspeksyon.

-- ADVERTISEMENT --

Magpahigayon usab og imbestigasyon ang MARINA aron masuta ang hinungdan sa sunog ug masusi ang posibleng mga kalapasan sa administratiba ubos sa kasamtangang mga regulasyon sa kaluwasan sa kadagatan.

Gipasalig pag-usab sa MARINA ang estriktong pagpatuman sa maritime safety ug ang pagpanalipod sa mga pasahero ug tripulante, dungan sa paghatag og gibug-aton nga kinahanglang makab-ot sa mga barko ang tanang sukdanan sa kaluwasan sa dili pa kini tugotan nga makabalik sa operasyon.