Naghiusa ang mga eksperto sa panglawas ug mga opisyal sa lokal nga kagamhanan aron palig-onon ang pagbakuna batok sa Human Papilloma Virus (HPV), isip lakang aron mapugngan ang pagsaka sa mga kaso sa cervical cancer sa mga kababayen-an.
Matod sa Department of Health 7 (DOH 7), nakita sa rehiyon ang pagsaka sa gidaghanon sa mga kaso sulod sa lima ka tuig gikan sa 52 niadtong 2021 ngadto sa kapin 200 sa tuig 2025.
Busa nanawagan ang mga eksperto ug mga opisyal sa gobyerno ngadto sa publiko, ilabi na sa mga ginikanan, nga moapil sa mga programa sa pagbakuna nga gipasiugdahan sa DOH ug sa lokal nga kagamhanan.
Gipasiugda niini nga inisyatibo ang mga paningkamot sa pagpalig-on sa mga programa sa pagbakuna batok sa HPV sa mga eskwelahan, inubanan sa koordinasyon sa mga pampubliko ug pribadong tulunghaan. Diin ang programa nagtutok ilabi na sa mga kwalipikadong batang babaye nga nag-edad og 9 hangtod 14-anyos, lakip na ang mga estudyante sa Grade 4 ug Grade 5.
Ang kampanya nagsuporta sa global nga estratehiya sa World Health Organization nga wagtangon ang cervical cancer isip usa ka problema sa panglawas sa publiko. Tumong niini nga mabakunahan batok sa HPV ang 90 porsyento sa mga batang babaye sa dili pa sila mag-edad og 15-anyos.
Gipahimug-atan ni Dr. Cyrus Cesar R. Tejam, usa ka eksperto sa prevention sa cervical cancer ug vaccine confidence, ang kamahinungdanon sa paghatag og prayoridad sa mga babaye alang sa Human Papillomavirus (HPV) vaccination program.
Sumala ni Dr. Tejam, ang mga babaye ang kinahanglang unahon sa pagpabakuna tungod kay sila ang adunay cervix, diin ang pinakadakong peligro ug burden sa cervical cancer nahimutang diha sa ilang sektor. Gipasabot niya nga wala kini nagpasabot nga walay vaccination services alang sa mga lalaki, apan mas dako ug mas dinalian ang bentahe kon sugdan kini sa paghatag sa mga kababayen-an.
Dugang pa ni Dr. Tejam, dakong babag sa pagsalig sa bakuna ang katap nga misimpormasyon o fake news. Busa, mipadayag siya sa ka-ironic sa mga supak nga pamahayag nga nahidungog gikan sa pipila ka mga ginikanan nga adunay moingon nga makabaog ang bakuna, samtang adunay usab moingon nga makapadasig kini sa mga bata nga mahimong sexually active.
Aron mabuntog kining supak ug sayop nga pagtuo, gipasiugda ni Dr. Tejam ang kamahinungdanon sa sakto ug matuod nga pagpakaylap sa impormasyon ug ang aktibong pagpakig-alayon o pakig-istorya sa mga ginikanan aron masiguro ang panalipod sa kalawasan sa katilingban.
