Mokabat sa ₱56.1 milyon nga kantidad sa tabang alang sa pagpabalay ug panginabuhian ang giturn-over sa Philippine Red Cross (PRC) ngadto sa mga pamilyang naapektuhan sa linog ug mga bagyo sa Bogo City ug San Remigio, lalawigan sa Sugbo.
Gipahigayon ang turnover ceremony sa Don Celestino Sports Complex ganinang alas 11 sa buntag, Nobyembre 22, 2026, diin gipangulohan kini ni PRC Chairman ug CEO Richard J. Gordon, kauban si Secretary General Dr. Gwendolyn T. Pang ug mga lokal nga opisyal.
Gikan sa maong kantidad, mokabat sa ₱37.4 milyon ang gigahin alang sa Shelter Repair Assistance nga nakabenepisyo sa 203 ka panimalay sa Bogo City nga mokabat sa ₱16.3 milyon, samtang 302 ka panimalay sa San Remigio ang nakadawat og tabang nga nagkantidad og ₱21.1 milyon.
Dugang niini, gigahin usab ang ₱15.3 milyon alang sa Full Shelter Assistance nga naglakip sa mga materyales ug gasto sa pagpatukod o pag-ayo sa mga balay sa 60 ka panimalay sa Bogo City ug 74 sa San Remigio.
Samtang 320 ka panimalay usab ang nakadawat og livelihood assistance nga mokabat sa ₱2.8 milyon, diin matag usa kanila makadawat sa inisyal nga grant nga siyam ka libong pesos aron makatabang sa pagpabalik sa ilang panginabuhian ug tinubdan sa kita.
Matud ni Gordon, dili lamang pagtukod pag-usab sa mga balay ang tumong sa maong programa, kondili ang pagpasig-uli usab sa dignidad, kaluwasan ug paglaum sa mga pamilyang nawad-an tungod sa kalamidad.
Kabahin ang maong tabang sa ₱360 milyones nga 2025 hangtod 2027 Overall Multi-Hazard Operation sa PRC nga naglangkob sa 18 ka probinsya sa nasud ug gilauman nga mahuman sa Pebrero 2027.
Gipasiugdahan ang maong operasyon isip tubag sa dagkong kalamidad niadtong 2025, lakip ang linog sa Northern Cebu ug Davao Oriental, ingon man ang mga bagyong Opong, Nando, Tino ug Super Typhoon Uwan.
Sa kinatibuk-an, mokabat sa 20 milyones ka tawo sa 70 ka probinsya ang naapektuhan sa maong mga kalamidad, samtang kapin sa 935,000 ka mga balay ang naguba.











