Malampusong gipahigayon sa BOMBO RADYO PHILIPPINES ang Dugong BOMBO 2026: “A Little Pain, A Life to Gain,” ang ilang nasudnong kampanya sa pagdonar og dugo, inubanan sa Bombo Radyo Philippines Foundation, Inc. ug sa Philippine Red Cross.
Gipahigayon dungan sa tibuok nasod niadtong Nobyembre 14, 2026, ang Dugong Bombo diin nakatigom og kinatibuk-ang gidaghanon nga 1,964,250 cubic centimeters (cc) sa dugo—katumbas sa gibana-banang 1,964 ka litro, 518 ka galon, o dul-an sa 10 ka drum sa dugo—gikan sa kinatibuk-ang 4,365 ka malampusong mga donor sa tibuok nasod.
Nagpadayag ang Bombo Radyo Philippines sa ilang kinasingkasing nga pasalamat ngadto sa TANAN nga malampusong nakadonar og dugo, lakip na kadtong nagparehistro apan wala maka-donar tungod sa mga rekisitos sa medical screening. Nagpasalamat usab sila sa tanang mga partner, local government units, mga organisasyon sa katilingban, mga boluntaryo, ug nagkalain-laing grupo kansang bililhong suporta nakatabang sa kalampusan sa DUGONG BOMBO!
Ang dul-an sa 10 ka drum sa dugo nga natigom makatabang sa pagdugang sa suplay sa mga blood bank, ilabi na sa padayon nga panginahanglan alang sa BLOOD TRANSFUSION o pag-abono og dugo ug uban pang emerhensiyang medikal nga panginahanglan.
Kini nga nasudnong inisyatibo makatabang sa pagsiguro nga mas daghang pasyente ang makakuha og dugo—nga mahimong makaluwas sa kinabuhi—sa panahon nga gikinahanglan kaayo nila kini.
Sa Bombo Radyo ug Star FM Cebu, nakakolekta usab og 191 ka mga successful donors, gawas pa kini sa mga wala maka-qualify apan ang ilang tinguha nga makadonar kay nagpakita sa ilang pagpakabana sa ilang isig-katawo.
Labaw pa sa usa ka kampanya sa pagdonar og dugo, ang DUGONG BOMBO nagpakita sa diwa sa kalooy, kamahinatagon, ug bayanihan. Ang matag donasyon sa dugo nagdala og paglaom ug laing higayon aron makaluwas og kinabuhi. Ang mga malampusong donor nakadawat og espesyal nga disenyo nga Dugong Bombo t-shirt, init nga pagkaon, mga bitamina, meryenda, ug mga ilimnon.
Ngadto sa tanan nga midonar, miapil, nagboluntaryo, ug misuporta sa kampanya, DAGHANG SALAMAT sa paghimo sa Dugong BOMBO 2026 nga usa ka kalampusan!
