Wala magpanuko sa paghapit ug pagdali-dali ang usa ka regular blood donor aron makagukod sa pagpaambit sa iyang dugo sa gipahigayong Dugong Bombo 2026 sa SM Seaside City Cebu, bisan pa man og padung na untang manghipos ang mga personahe.
Matod sa katapusang donor nga nahinabi sa Bombo Radyo, gikan sila sa ilang panimalay ug paingon unta manimba sa Plaza Independencia, apan nihapit sila sa usa ka kapehan sa maong mall.
Sa dihang iyang nakita nga hapit na mahuman ug nanghipos na ang blood-letting activity, dali-dali siyang niduol aron masuta kon makahigayon pa ba siya sa pag-donate.
Gibutyag sa maong Type O+ donor nga nasayod siya sa maong kalihokan pinaagi sa Facebook page sa SM Seaside. Dugang pa niya, dili na kini ang unang higayon nga naka-donate siya sa Dugong Bombo sanglit nagsugod siya niini sukad pa sa kolehiyo, diin dili na niya maihap kon makapila na siya nakapaambit og dugo.
Gipasabot usab niya nga ang iyang mama ug papa ang nagdasig kaniya sa pag-donate og dugo aron makatabang sa mga nanginahanglan, ug wala siya bati-a og kahadlok o kakulba sukad sa iyang pinakaunang pagpakuha og dugo kauban ang iyang pamilya.
