Giawhag sa Philippine Red Cross Cebu Chapter ang publiko nga moapil sa bloodletting activity nga Dugong Bombo 2026 karong adlawng Sabado, Nobyembre 14, nga ipahigayon sa Seaview Wing Atrium sa SM Seaside City Cebu, aron makatampo sa pagluwas sa kinabuhi pinaagi sa boluntaryong pagdonar og dugo.
Sa pakighinabi kang Ms. Charlene Mae Watin, RMT, Donor Recruitment Officer sa Philippine Red Cross Cebu Chapter, gipasiugda niini ang kahinungdanon sa pagpangandam sa dili pa magdonar og dugo.
Gipahinumdoman ang mga donors nga kinahanglang makatulog og unom hangtod walo ka oras, mokaon og saktong pagkaon ug dili moadto sa bloodletting activity nga walay sulod ang tiyan.
Gidasig usab ang tanan nga likayan ang pag-inom og alcoholic beverages ug siguruhong hydrated ang lawas sa dili pa magdonar.
Gipasiugda ni Watin nga importante usab ang pagkamatinud-anon sa paghatag og impormasyon panahon sa donor screening ug interview aron maseguro nga himsog ug kwalipikado ang matag donor.
Gipasalig usab sa Philippine Red Cross nga andam ang ilang medical team sa paggiya ug pagtabang sa mga donors aron masiguro ang kaluwasan sa proseso sa pagdonar og dugo.
Gidapit ni Watin ang tanang interesado nga moapil sa Dugong Bombo 2026 nga pagahimoon karong adlawa, alas 8:00 sa buntag hangtod alas 5:00 sa hapon sa SM City Cebu.
Dugang pa niini, giawhag niya ang publiko nga suportahan ang maong kalihokan tungod kay ang matag donasyon sa dugo mahimong makatabang sa pagluwas sa kinabuhi sa mga nanginahanglan og blood transfusion.
