Nagpadayag ang Cebu City Police Office (CCPO) sa ilang kaandam nga mopaubos sa objective nga imbestigasyon sa tensyon nga miulbo atol sa protesta sa mga estudyante gikan sa nagkalain-laing unibersidad ug mga progresibong grupo sa Colon Street niadtong Lunes, Nobyembre 16.
Sa usa ka pahayag nga gi-isyu niadtong Martes, Nobyembre 17, ang CCPO nagkanayon nga ang mga personahe niini wala magsugod sa kagubot, nga nag-ingon nga sila nagtuman lamang sa ilang mga katungdanan aron mapadayon ang kahusay, masiguro ang kaluwasan sa publiko, ug masiguro ang lugar sa protesta.
Mibutyag ang Police Office nga ang mga personahe niini nagsunod lamang sa Police Operational Procedures (POP), gitahod ang tawhanong katungod sa mga nagprotesta, ug nagpakita sa labing taas nga pagkamatugtanon ug pagpugong gikan sa pagsugod sa panagtapok.
Sigon sa CCPO nga gitugotan nila ang mga nagprotesta nga ipadayon ang ilang programa bisan pa nga walay permit sa rally, isip pag-ila sa ilang katungod sa malinawong pagtigom ug kagawasan sa pagpahayag.
Apan, taliwala ninini ilang gihimug-atan nga ang pagsunog sa usa ka effigy nakalapas sa mga probisyon sa Batas Pambansa 880, o ang Public Assembly Act.
Gipasabot niini nga ang kalihokan nahitabo sa Colon Street, usa sa pinaka-busy nga mga dalan sa Dakbayan sa Sugbo, nga nanginahanglan sa presensya sa mga pulis ug sa City Disaster Risk Reduction and Management Office (CDRRMO).
Andam usab ang mga kapulisan nga imbestigaran ang mga alegasyon nga giingung adunay duha ka miyembro sa media ang nasamdan atol sa insidente. Giawhag sila niini nga mopasaka og pormal nga mga reklamo aron ang ilang mga report matubag sa husto.











