-- ADVERTISEMENT --

CENTRAL VISAYAS- Giklaro sa Police Regional Office 7 (PRO7) nga walay tear gas nga gigamit ang kapulisan atol sa nahitabong rally nga misangpot sa kagubot ug pagkasamad sa pipila ka partisipante, sa pagpahigayon sa Anti-Pax Silica Rallies niadtong Lunes, Nobyembre 16, 2026.

Matod ni Police Lieutenant Colonel Rolan Aliser, tigpamaba sa PRO7, ang aso nga nakapahinabo sa iritasyon sa mata ug respiratory system sa pipila ka rallyista gikan lamang sa fire extinguisher nga gigamit sa pagpalong sa kalayo. Gipasabot niya nga kini adunay sulod nga kemikal nga mahimong hinungdan sa iritasyon kon masuyop o ma-expose niini ang usa ka tawo.

Samtang, padayon na ang imbestigasyon sa Cebu City Police aron matino kon kinsa ang responsable sa pagsugod sa komosyon atol sa maong protesta. Girepaso na sa kapulisan ang mga video footage nga nakuha sa lugar aron mailhan ang mga indibidwal nga nalambigit sa insidente, lakip na kon gikan ba sa han-ay sa mga rallyista o sa kapulisan ang unang nakapahinabo sa kagubot.

Gipatin-aw usab ni Aliser nga adunay mga police personnel nga nakaangkon og minor injuries atol sa maong hitabo, apan padayon gihapon ang ilang pagmonitor sa mga kalihokan sa mga nagprotesta, subay sa ilang katungdanan sa pagmintinar sa kalinaw ug kahapsay ug pagrespeto sa katungod sa katawhan sa pagpahayag sa ilang mga opinyon.

Dugang pa sa opisyal, kanunay nang gipahinumdoman sa kapulisan ang mga rally organizer nga sundon ang mga probisyon sa Batas Pambansa 880 o Public Assembly Act of 1985, ilabi na ang mga lagda nga may kalabotan sa pagpahigayon sa mga public assembly.

-- ADVERTISEMENT --

Gipasabot usab sa PRO7 nga kon mapamatud-an sa imbestigasyon ang paglapas sa balaod, posible nga pasakaan og angay nga kaso ang mga indibidwal nga responsable sa pagsugod sa kagubot.

Samtang, wala pa maghatag og kataposang konklusyon ang kapulisan kon kinsa ang mahimong tulubagon, samtang nagpadayon pa ang pagrepaso sa mga ebidensiya ug kuha sa video.