-- ADVERTISEMENT --

CEBU CITY- Patay ang usa ka 48-anyos nga volunteer firefighter human nagbangga ang iyang motorsiklo ug ang laing motorsiklo—nga gituohang gimaneho sa usa ka hubog nga drayber—diha sa Transcentral Highway (TCH) sa Sitio Maling, Barangay Babag, Siyudad sa Sugbo, pasado alas 5:57 sa hapon niadtong Huwebes, Nobyembre 19, 2026.

Ang biktima giila nga si Floranti Cavan Delima, usa ka volunteer firefighter nga nadestino sa Maguikay Fire Sub-Station.

Samtang, giila sa kapulisan ang usa pa ka drayber nga si Axel Oliver Francisco Costelo, 22-anyos, taga-Pooc, Siyudad sa Talisay.

Base sa imbestigasyon sa Traffic Enforcement Unit (TEU) sa Cebu City Police Office (CCPO), nagsubay si Delima sa pataas nga bahin sa dalan padulong sa Balamban, samtang si Costelo, nga nagpadulong sa ubos paingon sa Siyudad sa Sugbo, gituohang misulod sa pikas lane ug mibangga kang Delima.

Tungod sa kakusog sa impak, nangalagpot ang duha ka drayber gikan sa ilang mga motorsiklo og pipila ka metros.

-- ADVERTISEMENT --

Daling gidala si Delima sa Perpetual Succour Hospital apan gideklarar nga dead on arrival pasado alas 6:50 sa gabii, samtang si Costelo gidala usab sa Cebu City Medical Center ug gibutang ubos sa kustodiya sa kapulisan.

Ang resulta sa Alcohol Breath Analyzer test nagpakita nga si Costelo adunay alcohol reading nga 0.492 per mille.

Giisyuhan siya og Temporary Operator’s Permit tungod sa pagmaneho samtang ubos sa impluwensya sa ilimnong makahubog.

Giandam na usab sa TEU ang kasong Reckless Imprudence Resulting in Homicide batok kaniya.