Ipasaka na karong adlawa, Oktubre 27, sa Cebu City Police Office ang murder case batok sa napulo ka mga indibidwal nga giingong nalambigit sa pagpatay sa 23-anyos nga si Isaac Viernes.
Apil sa kaso ang pagtabon sa lawas sa biktima gamit ang semento ug paglubong niini sa usa ka bakanteng luna sa kanhi Citilink Terminal sa Barangay Pahina Central, Cebu City.
Nadiskubrehan ang lawas ni Viernes niadtong Oktubre 19 human mipahibalo ang usa ka residente sa iyang pamilya.
Matud ni Police Lieutenant Colonel Gerard Ace Pelare, deputy city director for operations sa CCPO, nakakuha ang mga imbestigador og duha pa ka extrajudicial confession nga mitumong sa ubang mga tawo nga posibleng nalambigit sa krimen.
Dugang sa kapolisan, usa sa mga tawo miangkon nga mitabang sa pagsagol sa semento nga gigamit sa pagtabon sa lawas ug sa pagpalit og uling.
Ang usa pa, giingong gitahasan sa pagkuha sa armas nga gituohang gigamit sa pagpamusil kang Viernes.
Basi usab sa mga confession, nadungagan pa ang duha ka mga ngalan, lakip ang usa ka babaye nga giingong inahan sa usa sa mga suspek ug mitabang sa pagtago sa lawas, ug laing tawo nga giakusahan sa pagpanakit kang Viernes.
Gibutyag sa CCPO nga nakatigom usab sila og CCTV footage ug mga extrajudicial confession isip ebidensiya nga isumite sa City Prosecutor’s Office.
Gikanayon ni Pelare, nagtuo ang mga imbestigador nga adunay usa ka tawo nga maoy nagmando sa pagpatay, samtang ang ubang mga suspek gitahasan sa nagkalain-laing buluhaton. Ingon man nga giila na sa kapolisan ang giingong mastermind apan kini nagpabiling gawasnon.
Samtang, ang giingong motibo sa pagpatay mao ang panimalos tungod sa usa ka insidente diin si Viernes giakusahan nga nakapanakit sa usa ka gay nga lalaki sulod sa convenience store sa maong barangay. via Bombo Rocky Lavarez
