Gipasalig ni Talisay City Mayor Samsam Gullas nga manubag ug dakpon ang responsible sa nagpusil-patay sa usa ka 41-anyos nga parking attendant sa Tabunok Public Market sa N. Bacalso Avenue, Barangay Tabunok, Siyudad sa Talisay, pasado alas 6 sa gabii niadtong Sabado.
Diin gimandoan na niini ang mga sakop sa kapulisan sa Talisay pinaagi sa pangu sa Talisay City Police Station nga si Police Lieutenant Colonel Leo Logroño nga ilhon ug dakpon ang responsable sa krimen.
Giila ang biktima sa alyas nga “Dondel,” usa ka residente sa Molave Extension, Barangay Tabunok, ug aduna na’y “person of interest” ang mga otoridad apan wala pa sila mipagawas og dugang detalye.
Nasayran usab nga nakadawat na kaniadto og mga hulga ang biktima batok sa iyang kinabuhi, ingon man nga wala kini mipauli sa iyang pinuy-anan tungod sa kahadlok alang sa iyang kaluwasan.











