Patay ang 61-anyos nga Senior Citizen human natarantar, madusmog og gituohang misaka ang kabuhi nunot na sa kalisang sa nahitabong pagmamusil kagabii pasado alas 10:00 sa gabii sa Sitio Ice Seeker, Barangay Ermita ning syudad sa Sugbo.
Giila ang namatay nga si Elvira Tonion, 61 anyos kinsa patay nang miabot sa Cebu City Medical Center (CCMC).
Nabulabog niadtong Lunes sa gabie, Nobyembre 10, ang normal nga panginabuhi-an sa mga nanimuyo sa Sityo Ice Seeker sa nahisgutang Barangay tungod sa nahitabong pag pamusil.
Gisaysay ni Marissa Tonion igsoon sa namatay ang nadangatan ni Elvira sa rason sa pagkakalas niini..
Matud pa niya nga natulog ra ang maong biktima ug sa dihang nakadungog kini og tingog sa pagbuto sa pusil, dalo kining nakabangon ug nakapangutana kung kinsa ang gipusil, apan kalit lang kini nga giatake sa kasing-kasing.
Dugang ni Tonion, nga daan na nga nag-rigor ang huna-huna sa biktima human sa nahitabong insidente sa pagpamusil kaniadto dinhi sa maong dapit ug gibaharan nga ang anak ug ang pag-umangkon sa biktima ang sunod nga patyon.
Hinungdan nga nagtuo gyud kining biktima nga ang gipusil kagabii usa sa iyang anak o pag-umangkon nga miresulta sa iyang pagka-atake.
Dali kining gidala sa tambalanan, apan gideklarar kining dead on arrival.
Padayon ang imbestigasyon sa kapulisan aron matino ang tinuod nga hinungdan sa pagpamusil, ingon man mailhan ug madakpan ang responsabli sa maong krimen.
