-- ADVERTISEMENT --

Giklaro sa Department of Education (DepEd) Region 7 nga dili “one-size-fits-all” ang pagpatuman sa suspensyon sa klase tungod sa grabeng kainit sa panahon, kondili ipasikad kini sa aktwal ug dokumentadong on-site assessment sa matag tunghaan.

Sumala ni Amaryllis Villarmia, ang Regional Information Officer sa DepEd 7, ubos sa Executive Order (EO) 130 sa Kagamhanan sa Dakbayan sa Sugbo, adunay tulo ka mekanismo sa pagsuspenso ug pagbalik sa klase: ang automatic, localized, ug granular suspension ug resumption.

Matod ni Villarmia, nagpahigayon na og hiniusang tigom ug konsultasyon ang Schools Division sa Cebu City kauban ang mga school heads aron susihon ang tinuoray nga sitwasyon sa mga tulunghaan.

Dugang niya, dili tanang eskwelahan ang nakasinati og hilabihan ka taas nga heat index o direktang nabutang sa peligro sa grabeng kainit, hinungdan nga gi-classify kini ug dili ipatuman sa tanan sa samang higayon.

Ingon man nga ang resulta sa maong hiniusang pagsusi gisumiter na ngadto sa lokal nga kagamhanan sa Cebu City, nga maoy nagtukmod kang Mayor Nestor Archival sa pagpagawas og executive order kalabot niini.

-- ADVERTISEMENT --

Sa pagkakaron, ang Cebu City pa lamang ang nakahimo og susamang konsolidasyon sa maong lakang, samtang nagpaabot pa ang DepEd 7 sa opisyal nga dokumento ug espesipikong datos gikan sa ubang lugar sama sa Lalawigan sa Sugbo.

Gawas sa granular suspension, nagpadayon usab ang pagpangandam sa mga tunghaan sa rehiyon sa pagpatuman og mga adaptive ug mitigating measures aron mapanalipdan ang mga tinun-an ug magtutudlo batok sa epekto sa kainit sa panahon. via Bombo Rocky Lavarez