Gipahibalo sa Department of Education Region 7 (DepEd-7) nga aduna gihapoy kapin kun kulang 100 ka mga klase—kasagaran sa amihanang bahin sa Sugbo ang nagpadayon sa pagklase sulod sa mga tent ug temporaryong pasilidad human naapektuhan ang ilang mga tunghaan sa 6.9 magnitude nga linog.
Sumala ni Ranilo Edar, Disaster Risk Reduction Focal Person sa Education Support Services Division sa DepEd-7, dili gayud kalikayan nga aduna pay mga klase nga anaa sa mga tent karon, ilabi na sa mga eskwelahan nga naguba sa maong kusog nga linog, lakip na usab sa mga naapektuhan sa Bagyong Tino.
Gipasabot ni Edar nga sa maong 100 ka mga klase, lakip na niini ang naggamit sa gitawag nga Temporary Learning Spaces (TLS), samtang mokabat sa kapin kon kulang 20 ka mga klase ang anaa sa mga ventilated nga tent nga gidonar sa UNICEF.
Gawas sa mga tent ug TLS, gihisgutan usab sa opisyal nga adunay mga Learning Continuity Spaces nga gitukod alang sa mga tinun-an, diin gihulagway niya kini nga mas nindot ug mas komportable pa itandi sa naandang standard classroom.











