Mihimo ang lokal nga pangagamhanan sa Liloan og kaugalingong protocol sa learning arrangements sa mga eskwelahan nga ga depende sa Air Quality Index o AQI.
Matud ni Liloan Mayor Aljew Frasco, kon maayo o healthy ang kalidad sa hangin, magpadayon ang face-to-face classes, apan kon moabot sa AQI nga 101 hangtod 150 or Unhealthy for Sensitive Groups, ipatuman sa kagamhanan ang estriktong pagsul-ob og face mask sa mga tunghaan.
Samtang kon moabot usab kini sa 151 hangtod sa 200 ang AQI, ang alternative learning maoy ipatuman sa Grade 1 hangtod Grade 3, samtang mahimong magpadayon ang klase sa mas taas nga lebel basta adunay igong proteksyon kon mag sul.ob ug face mask.
Kon maabot sa peligroso o emergency level ang polusyon ngadto na sa 201 pataas, alternatibong learning arrangements ang ipatuman sa tanang grade level or walay face to face classes na mahitabo, samtang ang mga estudyanteng adunay sakit sa respiratory ug cardiovascular system mahimo usab nga mohangyo og alternative learning, provided nga adunay silay medical documentation.
Giawhag usab ni Frasco ang publiko nga kanunayng mosubay sa mga pahimangno sa Environmental Management Bureau o EMB7.
Sa pikas bahin, nagpatawag si Cebu Governor Pamela Baricuatro og open forum karong Oktubre 20 sa Capitol Social Hall aron hisgotan ang kalidad sa hangin ug mga giya sa pagsuspenso sa klase.
Gidapit ang mga mayor, eksperto sa panglawas, mga ahensya sa edukasyon ug kalikupan, mga eskwelahan ug mga representante sa ginikanan aron maghisgot sa mga sukdanan sa kalidad sa hangin, kaluwasan sa mga estudyante ug tukmang pagpahibalo sa publiko.
