Usa ka fastcraft nga gi-operate sa OceanJet nga nagbiyahe padulong sa Ormoc City gikan sa Cebu City ang nasunog niadtong adlawng Domingo, Nobyembre 22, pasado alas 10:30 sa buntag.
Matud ni Hazel Campomanes, usa sa mga pasahero nga nakugang nalang ang mga pasahero sa panghitabo, gumikan kay kalit silang nakadungog og pagbuto lakip na ang aso gikan sa ubos nga bahin sa fastcraft.
Sigon niini, nga grabe ang nasinati nga kahadlok sa mga tawo, gumikan kay wala sila mahibawo sa igong rason sa pagkasunog sa fastcraft.
Gibutyag ni Hazel, nga nataud-tauran pa ang ang pagrescue sa Philippine Coast Guard, diin iyang gisaysay nga moabut sa 2-ka oras una miabot ang mga sakop niini aron sila i-rescue.
Dugang niini, anaa untay laing 2-ka sakayang pandagat ang misulay sa pag-rescue sa mga pasahero, apan gumikan sa dagkong balud sa kadagatan, nahimong hagit ang pagpabalhin sa mga pasahero.
Human sa 2 ka oras, hingpit nga na rescue ang mga pasahero ug gipabalhin ngadto sa OceanJet 88 ug hingpit na usab nga nakapauli sa Ormoc City ang 326 nga mga pasahero, lakip ang pagpanghatag ug mga pasiunang tabang.
Sa pagsuwat ning balita, wala pay igong rason sa pagkasunog sa OceanJeat 168.





