-- ADVERTISEMENT --

Gipasabot ni Cebu Governor Pamela Baricuatro ang mga lakang sa kagamhanan aron matabangan ang mga lokal nga hog raisers sa probinsya pinaagi sa pagkontrolar sa pagsulod sa mga baboy gikan sa Negros ug pagpangita og direktang merkado alang sa mga gagmayng mamuhi og baboy.

Sumala sa gobernadora, nakigpulong na siya sa mga lokal nga hog raisers ug gitambagan sila nga magtukod og usa ka kooperatiba o asosasyon aron mas mapalig-on ang ilang tingog. Usa sa mga nag-unang rekomendasyon sa grupo mao ang pag-ban sa pagsulod sa mga baboy gikan sa Negros.

Apan gipasabot ni Baricuatro nga imbes nga hingpit nga i-ban—nga sa nangaging kasinatian lisod kontrolahon ug makausik lang sa oras sa kapulisan sa pagbantay sa mga pantalan, ingon man nga nakigsabot siya kang Negros Occidental Governor Eugenio Jose “Bong” Lacson nga limitahan na lang ang gidaghanon sa mga baboy nga pasudlon sa Sugbo.

Matud pa sa gobernador, gikinahanglan gihapon sa mga lechoneros sa Sugbo ang suplay gikan sa Negros, ilabi na ang mga native nga baboy nga giingong mas maayo alang sa lechon. Sa pagkakaron, nakig-alayon na ang probinsya sa Department of Agriculture (DA) aron matino ang eksaktong limitasyon sa suplay nga tugotan aron makakita gihapon og kita ang mga lokal nga hog raisers.

Gawas niini, gipaambit usab ni Baricuatro nga nakig-estorya siya kang Agriculture Secretary Francisco Tiu Laurel Jr., diin gipahibalo siya nga ipatuman sa nasyonal nga kagamhanan ang 60-ka-adlaw nga importation ban sa mga frozen meat gikan sa gawas sa nasud. Kini human naapektuhan ang tibuok industriya sa pagpamuhig baboy sa nasud—lakip na ang Sugbo—tungod sa pagsulod sa giingong 500 metric tons nga imported meat nga nagkantidad og P28 bilyones.

-- ADVERTISEMENT --