Gilugwayan sa mga grupo sa mga “hog raisers” ang ilang “Pork Holiday”—nga nagsugod kagahapon, Oktubre 22—og dugang usa ka adlaw aron iduso ang dinaliang pagpatuman sa temporaryong pagdili sa pag-import og karne sa baboy.
Gikumpirmar ni Nicanor Briones, ang Representante sa Agricultural Sector Alliance of the Philippines (AGAP) Party-list, atol sa usa ka press briefing human sa usa ka malinawong protesta atubangan sa opisina sa Department of Agriculture.
Matod ni Briones, ang maong panawagan nagtumong sa paghatag og higayon sa mga lokal nga nag-alaga og baboy nga makabawi gikan sa padayon nga pagkalugi sa pinansyal, nga dala sa pagbaha sa mga gi-import nga karne sa baboy sa nasud.
Ang grupo nagduso alang sa pagdili sa pag-import sulod sa upat ngadto sa lima ka bulan, nga maglangkob sa tanang produkto gikan sa baboy—lakip na ang karne, liempo, ug panit—aron mapugngan ang gitawag nga “technical smuggling,” nga gikatahong kaylap na karon.
Nagpasidaan si Briones nga kung mapakyas ang gobyerno sa paghimo og dinaliang aksyon, ang mga lokal nga nag-alaga og baboy mahimong makaatubang og pagkalugi nga moabot sa binilyon ka pesos.
Nagpasidaan ang mga grupo nga kung dili dayon matubag ang ilang mga kabalaka, daghang mga negosyo nga konektado sa industriya sa baboy ang mapugos sa pagsira sulod sa sunod nga unom ka bulan.
Kini nga sitwasyon dili lang makaapekto sa mga “hog raisers”, apan lakip na usab sa mga konsumidor, kinsa mahimong maglisod sa pagpalit og karne sa baboy kung mosaka ang presyo niini sa mga merkado.
Ang epekto sa paghunong sa pagbaligya ngadto sa suplay sa karne sa baboy gilauman nga mabati karong adlawa.
