Gilugwayan ang kasamtangang ceasefire sa tibuok rehiyon sa Kherson sa habagatang Ukraine aron mapadali ang paghatod sa pagkaon ug tambal ngadto sa siyudad sa Oleshky, usa ka lugar nga gilibotan ug kontrolado karon sa mga pwersa sa Russia.
Gibana-banang anaa sa 2,000 ka mga residente ang natanggong pa gihapon sa maong siyudad nga walay kuryente, tubig, o pagkaon—human naguba ang Kakhovka Dam niadtong 2023 ug gibutangan og mga landmine ang tanang agianan paingon sa naasoy nga dapit.
Ang kasabotan gipalapad pinaagi sa mga paningkamot ni US First Lady Melania Trump ug ni Pope Leo XIV, nga nagsiguro sa luwas nga pag-agi sa mga grupo nga nagdala og hinabang hangtod sa Nobyembre 1.
Ang duha ka habig nagpamatuod sa ilang pagsunod sa kasabotan, diin si David Arakhamia sa parlamento sa Ukraine naghulagway niini isip labing mahinungdanong lakang aron pakunhuran ang tensyon sa panagbangi sukad niadtong 2022.
Ang mga personahe sa militar nagsugod na sa pag-inspeksyon sa mga agianan ug pagtangtang sa mga eksplosibo aron mahimong posible ang paghatod sa mga hinabang karong Huwebes, ug ang pormal nga proseso sa pagbakwit sa mga tawo karong Biyernes.
Samtang, nagpahayag og kabalaka si Ukrainian President Volodymyr Zelensky mahitungod sa kaluwasan sa mga residente, samtang nagpadayon ang pag-ayo sa mga agianan diin naguba ang mga taytayan tabok sa Suba sa Dnipro.
