Nagpahibalo ang Department of Agriculture (DA) nga hapit 1 milyon nga mga Pilipino ang nahimong benepisyaryo sa Benteng Bigas Meron na (BBM) Program sukad kini gilunsad lima ka bulan ang milabay.
Sumala ni DA Assistant Secretary for Agribusiness, Marketing and Consumer Affairs Atty. Genevieve Velicaria-Guevarra, base sa pinakabag-o nga report ug datos gikan sa ilang departamento, hapit 900,000 ka mga benepisyaryo ang nakabenepisyo niining programa ug inisyatibo sa kasamtangang administrasyon.
Sunod niini, matod niya, ang iyang opisina nagtumong sa pag-modernize sa rehistrasyon alang sa programa aron masiguro nga ang mga gituyo nga benepisyaryo makakuha sa benepisyo sa nahisgutang programa.
Matod niya nga gilauman nga pinaagi sa modernisasyon sa rehistrasyon, makatabang kini sa mas paspas nga pagmonitor kung asa ug unsa ka subsob mopalit ang mga target nga benepisyaryo og P20 nga bugas.
