Patay ang usa ka lalaki nga adunay pending nga warrant of arrest sa armadong komprontasyon sa kapulisan sa Barangay Bayong, lungsod sa Balamban, niadtong Martes sa buntag, Agosto 13, 2024.
Giila ang suspek nga si Paulino Tribunalo Cordezar, hingkod ang pangidaron ug lumulupyo sa naasoy nga lugar.
Adunay pending nga warrant of arrest si Cordezar tungod sa paglapas sa Republic Act No. 10591, o illegal possession of firearms and ammunition, nga giisyu sa Regional Trial Court Branch 29 sa dakbayan sa Toledo.
Hinuon ang korte nirekomendar og piyansa nga P150,000 alang sa temporaryong kagawasan sa akusado.
Apan sa dihang gipatuman sa mga operatiba sa tracker team sa kapulisan sa maong lungsod, uban sa Special Action Force (SAF) ug 1st Provincial Mobile Force Company (PMFC), ang warrant of arrest ug pag-abot sa lugar, nabatyagan ni Cordezar ang ilang presensya ug gipabuthan niya ang iyang KG9 nga armas ang operating team, hinungdan nga mibalos sila og pagpusil.
Human sa komprontasyon, napalgan ang akusado nga nagbuy-od sa yuta nga adunay mga samad pinusilan sa lain-laing bahin sa iyang lawas, nagkupot og KG9 nga armas nga adunay duha ka tag-as nga magazine ug 40 ka buhing bala.
Gihatagan dayon og first aid sa mga mananambal sa SAF ang akusado ug daling gidala sa tambalanan sa lungsod; apan, gideklarar siya nga dead on arrival.
Dugang niini, nasikop usab sa operating team ang laing target sa ilang operasyon nga si Jovel Tribunalo Villegas, nga lumulupyo usab sa nahisgutang dapit ug paryente ni Cordezar.
Adunay usab pending nga warrant of arrest si Villegas sa kasong murder sa RTC Branch 29 sa dakbayan sa Toledo ug RTC Branch 70 sa dakbayan sa Lapu-Lapu, ingon man frustrated murder sa RTC Branch 72, Lapu-Lapu City.
Nakuha usab sa mga awtoridad gikan sa akusado ang usa ka kalibre .45 nga pistola nga adunay magazine ug tulo ka buhing bala, 50 ka dugang nga mga bala ug usa ka kalibre 7.62mm homemade nga pusil; ug 1 ka kilo sa pinaugang marijuana nga nagkantidad og P120,000.
Ang akusado temporaryong gibalhog sa kustodiya sa Balamban Police Station, samtang nagpaabot sa iyang turnover ngadto sa issuing nga korte.
