Gikompleto sa usa ka Cebuano ang top 10 sa March 2024 Licensure Examination for Professional Teachers diin lakip niini si Shiraz Dawn Tanginan, gikan sa Cebu Technological University-Main Campus nga anaa sa top 9.
Bisan paman sa dakong kalampusan, dili gihapon siya makatuo nga nalakip siya sa pinakamaayong nikuha sa maong examination.
Ilabi na nga dili sayon ang pagpangandam ug paningkamot ug nadungagan ang kalisod nga iyang nahiaguman sa dihang nahitabo ang wala damha nga maaksidente sa motor niadtong paingon kini sa pre-board exam.
Apan, wala gihapon kini nahimong babag sa iyaha gumikan nitunga kini sa exam taliwa sa iyang gibati nga sakit sa lawas.
Gawas kang Tanginan, ni-top usab ang lain pang mga tinun-an gikan sa managlahing unibersidad sa Sugbo sama nila ni Gracelyn Ygot nga anaa sa ikaduha nga puwesto ug Arnie Joy Emia nga anaa sa ika-unom nga puwesto nga susamang tinun-an sa Cebu Technological University – Moalboal.
Ingon man si Mary Rose Gaviola Garcia gikan sa Cebu Normal University nga anaa sa ika-8 nga pwesto.
Samtang sa Cebu topnotchers Secondary division, lima ka mga gradwado gikan sa University of the Visayas, Cebu Normal University, ug Cebu Technological University-Main Campus ang nahimutang sa ika-9 nga pwesto.
Ug ang duha ka gradwado gikan sa University of San Carlos nga si Flora Mae Ruiz ug gikan sa Cebu Normal University nga si Mary Tonje Aballe kinsa parehong nahimutang sa ika-10.
