Cebu City- Mukabat sa kapin tunga ka milyon ka pesoso ang gibanabanang danyos sa mitumaw nga sunog ganinang alas 12:14 sa udto sa Sitio Mahayahay, Barangay Calamba sa Dakbayan sa Sugbo. Matud ni SFO2 Alberto Jagdon, ang imbestigador sa BFP 7, nga dul-an 100 ka panimalay ang na-ugdaw sa sunog kung diin kasagaran ang gama sa light materials ang mga balay sa nahisgutang dapit hinungdan nga dali nikatap ang kayo.
Gibutyag ni Jagdon nga naglisod ang mga kabomberohan sa pagpawong sa kayo mahitungod sa kahigpot sa kalsada sa nahisgutang dapit. Basi sa inisyal nga imbestigasyon, nagsugod ang maong sunog sa nabiyaan nga kandila sa altar sa panimalay ni Princess Rama,usa ka residente sa nahisgutang dapit. Gibutyag pa ni Jagdon nga gikan naligo si Rama ug nakita niya nga adunay aso nga naggikan sa kwarto kung diin nahimutang ang kandila nga gidagkotan. Sa dihang musud na unta kini sa kwarto nakita na lang niini ang dako nga kayo.
Nasayran nga nagdagkot si Rama sa maong kandila mahitungod kay gikan kini sa Simala. Gituohan ni Jagdon nga natagak ang kandila gikan sa altar hinungdan nga miresulta kini sa ug dakong sunog sa dapit. Wala may natalang namatay sa maong insidente.
