Patay ang 11 ka mga tawo nga sakay sa usa ka gamay’ng eroplano human kini nahagsa sa habagatang bahin sa Kenya, sumala sa pahayag sa Mombasa Air Safari.
Matod sa kompanya, ang Cessna 208B Grand Caravan nga eroplano nagdala og walo ka mga pasahero gikan sa Hungary, duha gikan sa Germany, ug ang piloto nga taga Kenya, dihang kini nahagsa sa usa ka kakahoyan nga bungtod sa Kwale County, mga 25 ka milya gikan sa Diani Beach.
Nahitabo ang insidente alas 8:35 sa buntag lokal nga oras samtang padulong unta kini sa Kwichwa Tembo airstrip duol sa Maasai Mara Natural Reserve, nga anaa sa 500 milya amihanan-kasadpan sa Diani Beach.
Matod pa sa mga awtoridad, nawad-an og kontak ang eroplano sa control tower sa Mombasa International Airport sulod lamang sa 10 minutos human kini molupad, base sa pahayag ni Cabinet Secretary Davis Chirchir sa Ministry of Roads and Transport.
